Thomas Tuchel azakomeza gutoza u Bwongereza bwasezerewe na Argentine

U Bwongereza bwari bwabonye igitego cya Anthony Gordon mu gice cya kabiri, ariko bunanirwa kugumana intsinzi nyuma y'uko Argentine yishyura ikoresheje Enzo Fernández mbere y'uko Lautaro Martínez atsinda igitego cy'intsinzi mu minota y'inyongera.

Nyuma y'uyu mukino, Tuchel yabajijwe niba gutsindwa byatuma ava ku gutoza iyi kipe, asubiza ko azakomeza akazi ke kugeza mu Gikombe cy'u Burayi cya 2028, kizabera mu Bwongereza, Wales, Scotland na Ireland.

Yagize ati: "Dukomeje urugendo. Mfite amasezerano azageza ku Gikombe cy'u Burayi kizabera iwacu mu 2028. Nubwo ubu bigoye gutekereza ibyo bihe, ni byo ntegereje."

Tuchel yemeye ko kubura itike y'umukino wa nyuma bibabaje, ariko ashimangira ko kugera muri 1/2 cy'irangiza na byo ari intambwe ishimishije kuko ibihugu byinshi bikomeye bitabashije kuhagera.

INDI NKURU WASOMA :Tshisekedi yongeye gutegeka abasirikare n'abapolisi kuva mu birombe by'amabuye y'agaciro

Yakomeje avuga ko ubu intego ari ukuzamura ibyiyumviro by'abakinnyi mbere yo gukina umukino wo guhatanira umwanya wa gatatu bazahuramo n'u Bufaransa i Miami.

Ati: "Tugomba guhaguruka tukagaruka dufite imbaraga. Ni cyo siporo yo ku rwego rwo hejuru isaba."

Kapiteni w'u Bwongereza, Harry Kane, na we yagaragaje agahinda yatewe no gusezererwa, avuga ko ikipe yabo yakoze ikosa ryo kugerageza kurinda igitego kimwe aho gukomeza gushaka ikindi.

Nubwo amahirwe yo kwegukana Igikombe cy'Isi yarangiye, u Bwongereza buracyafite umukino wo guhatanira umwanya wa gatatu, mu gihe Tuchel we akomeje kwitegura urugendo ruganisha ku Gikombe cy'u Burayi cya 2028.